يمه يابراق ونور
أمي يابراق ونور ياامي يافرح الدهور
يايمه يملاكي الله عافي ويملا قلبك بالسرور
شخصك المليان جمال بستان مشبع بالزهور
حضنك الدافي الامان وكتين اخاف يبقالي سور
قلبك المليان حنان من غير كلف يسقي الطيور
ووشك الايمانو شع شايلي من ضيو البدور
حارساني بالدعوات دوام لا آفه لا مس لا كجور
أنا بلقى حجرك ليا راحه وكت يهد حيلي الفتور
مابلقى غيرك مرسى يوم لو تهت في همي البحور
لا مره إحساسك كضب لا روعتك يايمه زور
بطراكي يمه وكت زمان جايبي اللبيني مع الكسور
جيتينا بي تحنان وريد ختيتي قدامنا الفطور
قلتيلنا بسملو ياولاد وحزارى من انا مابدور
لو يوم ابينا بتزعلي ويوم ناكلو يغمرك السرور
أرض الهموم الخدرت بي رؤيتك تبقالي بور
يا ماسحي لي دمعي السخين وكتين زماني علي يجور
يا ساكبه فيني حنين وريد لو في دواخلي قسى الشعور
يا ماري زي نسمة سحر يا فايحي زي عطر البخور
ياربي تسعدي في دناك يايمه قبال النشور
يديكي لي طولت العمر ليلة القدر تجي ليك تزور
حنك علي ريدك إلي للجنه يبقو جواز مرور
ياالله تكرما في الارض وفي الجنه تبنيلا القصور
أنت غير مسجل في منتدى علوم الطيران السوداني . للتسجيل الرجاء اضغط هنـا 
يمَّه يابرَّاق ونور 
